Vətən müharibəsinin qazisi Nurlan Quluzadə ilə görüş keçirilib

SON XƏBƏRLƏR

Vətən müharibəsinin qazisi Nurlan Quluzadə ilə görüş keçirilib

2022.06.06, 04:38

Gunaz.tv

Görüşdə Mehdiabad Qəsəbə 2 saylı tam orta məktəbin müəllim və şagirdləri, kitabxananın oxucuları iştirak edib.

İlk öncə şəhidlərimizin əziz xatirəsi bir dəqiqəlik sükutla yad edilib.

Kitabxana filialının müdiri,şair Aytən Təhmasib 44 günlük Vətən Müharibəsində qəhrəmanlıq göstərmiş igid oğullarımız, qazilərimizlə görüşlərin keçirilməsinin məktəblilər və yetişməkdə olan gənc nəslin vətənpərvərlik ruhunda tərbiyələnməsində böyük əhəmiyyəti olduğunu, məktəblilərin bu cür görüşlərə xüsusi maraq və həyəcanla qatıldığını bildirərək sözü Nurlan Quluzadəyə verib.

Füzuli və Cəbrayıl rayonlarında gedən döyüşlərdə iştirak etmiş, Cəsur döyüşcü və Cəbrayılın azad olunmasına görə medalları ilə təltif olunmuş qazi keçdiyi döyüş yolundan, müharibə zamanı gördükləri və yaşadıqlarından,ön cəbhədə döyüşərkən xalqımızın nümayiş etdirdiyi birliyin əsgərləri necə ruhlandırdırdığından danışıb.

3-cü qrup Qarabağ müharibəsi əlili Nurlan Quluzadə Cəbrayıl rayonu uğrunda gedən döyüşlərdə bədənin müxtəlif nahiyələrindən xeyli sayda qəlpə yarası və yanıq xəsarətləri aldığını bildirib.

Tədbirdə AJB-nin və AYB-nin üzvü, jurnalist-yazar Natiq Cavadlının Zəngilan şəhidləri və qazilərinə həsr etdiyi və qazi Nurlan Quluzadə haqqında yazının da yer aldığı "Ölməzlik qazanan oğullar" kitabı oxuculara təqdim olunub, iştirakçıların çoxsaylı sualları cavablandırılıb.

Azərbaycan Respublikasının prezidenti İlham Əliyevə qazilər və şəhid ailələrinə göstərdiyi diqqət və qayğıya görə minnətdarlıq ifadə olunub.

Sonda, ixtisasca rəssam olan və bu sahəyə atası l Qarabağ müharibəsi qazisi Yaşar Quliyev tərəfindən yönləndirildiyini qeyd edən Nurlan Quluzadənin rəsm əsərlərindən ibarət sərgi nümayiş etdirilib.

GUNAZ.TV

SON XƏBƏRLƏR