Ermənipərəst Novardın qərəzi ABŞ Konqresində keçirilən dinləmələr zamanı Nümayəndələr Palatasının xarici münasibətlər komissiyasının sədri Novard Berman yenə də ermənipərəstliyindən qalmayıb. Türkiyənin Ermənistanla sərhədlərini açmasını zəruri sayan Novard Bermanın çıxışında diqqət çəkən bir bəyanat da səsləndirib. O deyib ki, Gürcüstan və Ermənistanda seçkilərdən sonra baş verənlər Azərbaycanda da baş verə bilər. Aydındır ki, ermənipərəst konqresmen bu çıxışıyla əslində Azərbaycanda payızda keçiriləcək prezident seçkilərindən əvvəl, indidən dünya ictimai rəyində Azərbaycanın mənfi imicini formalaşdırmağa çalışır. Eyni zamanda bu, Azərbaycanda ictimai rəyi də çaşdırmağa yönəlib. Ramiz Mikayıloğlu Məsələylə bağlı fikirlərini öyrəndiyimiz Milli Məclisin Analitik İnformasiya şöbəsinin rəhbəri Aydın Ağayev bildirdi ki, belə fikirlərə obyektiv qiymət vermək lazımdırsa, iki məqamı yadda saxlamaq lazımdır. Birincisi, Avropada, ABŞ, yaxud başqa ölkələrdə Azərbaycandakı daxili proseslər haqqında siyasətçi, təhlilçi nə deyirsə, ölkəmiz daxilində zövqə, kimə nəsə sərfəlidisə, ona uyğun dərhal dövriyyə buraxırlar. Digər tərəfdən, nəzərə almaq lazımdır ki, ölkənin hüdudlarından kənarda ölkə daxili məsələlər barədə səslənən fikirlər əksər hallarda məqsədli olur. Məqsədlidirsə, deməli, qərəzlidir. Aydın Ağayevə görə, ümumiyyətlə, bir sıra məsələlərdə Azərbaycanı Ermənistan və Gürcüstanla müqayisə etmək düzgün deyil. Azərbaycandakı siyasi sistemdə bərqərar olmuş siyasi mühit, hakimiyyət, qüvvələr nisbəti nə Ermənistanda, nə də Gürcüstanda var. Müqayisəyə səthi, yaxud qərəzli yanaşanda düzgün olmayan fikirlər səslənə bilir. Milli Məclisin Analitik İnformasiya şöbəsinin müdiri dedi ki, onu da unutmaq lazım deyil ki, bu və ya digər arzuolunmaz proseslərin baş verməsində xarici amilin rolu var: "Bunu biz Ukraynada da, Gürcüstanda da, hətta Qırğızıstanda da görmüşük. Sadəlöhv o insandır ki, düşünsün ki, Azərbaycan hakimiyyəti və onun siyasətini planlaşdıranlar bu şeyləri nəzərə almırlar. Mən Gürcüstan və Ermənistanda seçkidən sonra baş verənlərin Azərbaycanda təkrarlanması üçün qətiyyən şərait, şərtlər görmürəm. Kiminsə könlündən nə isə keçə bilər. Amma xarici ölkələrlə, region ölkələrilə hakimiyyətin qurduğu siyasi-iqtisadi münasibətlər qətiyyən belə bir fikri deməyə əsas vermir ki, xaricdən hansısa qüvvələr Ermənistanda və Gürcüstanda baş vermiş hadisələrin təkrarlanmasını istəsinlər. Mən buna obyektiv səbəb görmürəm". Aydın Ağayevə görə, onu da nəzərə almaq lazımdır ki, yeni müstəqillik qazanmış iki ölkədə seçkilər başa çatıb. Bütün diqqət Cənubi Qafqazda həm xarici, həm regional, həm də iqtisadi siyasətiylə seçilən Azərbaycana yönəlib. Bura istəyib-istəməyən beynəlxalq təşkilatları da qatmaq lazımdır. Yəni Novard Berman kimilərin fikirləri və ona əks fikirlər bundan sonra da səslənəcək. Bunları da çox sakit danışmaq lazımdır. Yeri gələndə də, bunların əsassızlığını, yaxud əsaslılığını təsdiqləyən təhlil vermək lazımdır: "Bir daha deyirəm ki, məsələni detallar üzrə təhlil edəndə, həmin fikirlərin obyektivliyinə, düzgünlüyünə heç bir əsas görmürəm". xalqcebhesi