İsveçlilərin gündəlik həyat tərzi

SON XƏBƏRLƏR

İsveçlilərin gündəlik həyat tərzi

2021.10.20, 07:36

Gunaz.tv

Lalə Zabitqızı İsveçlilərin gündəlik həyat tərzi Ötən yazımızdan məlumdur ki, isveçlilərin əşyalara münasibəti fərqlidir. Beləliklə, birinci növbədə bahalı və müxtəlif naxışlı mebellər, dəbdəbəli təmir olunmuş evlər, bahalı kürklər və s. İsveç insanının zövqünü oxşamır, daha çox yorucu təsir bağışlayır. İkincisi, onlar başqa şeylərin daha önəmli olduğunu düşünürlər. Beləliklə, İsveç əhalisi əşyalara asılılıqdan qurtulmağı bacarıb. Onların yaşayış tərzləri, gündəlik həyatı, əyləncəsi, həyata baxış tərzi də elə məhz ona görə bizimkindən fərqlənir. Məsələn, bir isveçli qadın bahalı əşya və ya bahalı geyim almağın yerinə hansısa başqa xarici ölkəyə gedib dincəlməkdən daha çox zövq alır. Məlumat üçün qeyd edim ki, burada başqa ölkələri gəzmək əhalinin ən çox sevdiyi şeydir və 15-16 yaşlarından ilk səyahətlərinə başlayırlar. Ölkənin içində İsveçin hər yerini qarış-qarış gəzməyən çox az isveçli var. Qeyd edim ki, burada evdə yemək bişirən ailələr azdır, pullarını və vaxtlarını daha çox restoranlara sərf edirlər. İş vaxtları bitdikdən sonra isveçlilər ya restoranlara, ya kitabxanalara, ya üzmə və idman zallarına üz tuturlar. Üzgüçülük və idman isveçlilərin ən çox önəm verdiyi və pul xərclədiyi şeylərdən biridir. Uşaqlarını hətta körpə yaşlarından, 2-3 aylarından üzmə kurslarına aparırlar. İsveçlilər ev heyvanlarını çox sevirlər və onlarla birgə vaxt keçirmək çox sevdikləri şeylərdəndir. Məsələn, itlərlə birlikdə təlim kurslarına qatılmaq üçün çox məmnuniyyətlə pul ödəyirlər və kursun gedişatından çox zövq alırlar. Əhalinin çox hissəsinin iştirak etdiyi və əyləndiyi yerlərdən biri də ictimai təşkilatlardır. İctimai təşkilatlar, demək olar ki, bütün sahələri əhatə edir. Məsələn, köhnə model maşınları olanlar özlərinin ictimai təşkilatlarını yaradır, görüşlər təşkil edir, birlikdə səyahət üçün vaxt təyin edir, maraqları əhatəsində müzakirələr aparırlar. Kitabxanalar daha çox əhalinin toplandığı yerlərdən biridir. Kitabxanalarda kitab oxumaqdan başqa orada təşkil olunmuş müxtəlif tədbirlərdə iştirak etmək isveçlilərin çox sevdikləri əyləncələrdən biridir. Gəmi səyahətləri isveçlilərin çox sevdikləri və istifadə etdikləri əyləncə növüdür. Bundan başqa, əhalinin daha çox vaxt ayırdığı şeylərdən biri isə piyada gəzinti, velosiped səyahəti, kilsələrdə mahnı oxumaqdır. bizimyol

GUNAZ.TV

SON XƏBƏRLƏR