Beynəlxalq Bəhai İcması: “Ruhani hökuməti bəhailərə qarşı repressiyaları səssiz-səmirsiz davam etdirir”

SON XƏBƏRLƏR

Beynəlxalq Bəhai İcması: “Ruhani hökuməti bəhailərə qarşı repressiyaları səssiz-səmirsiz davam etdirir”

2021.10.20, 07:36

Gunaz.tv

GünAzTV: Beynəlxalq Bəhai İcması oktyabrın 25-də Ruhani hökumətində bəhailərə qarşı təzyiq və repressiyaların davam etdirilməsi barədə yeni hesabat yayıb.

122 səhifədə hazırlanan hesabatda bildirilir ki, İran prezidentinin ölkədə dini ayrı-seçkiliyə son qoyulacağı və insan haqlarına riayət ediləcəyi barədə verdiyi vədlərinə baxmayaraq, onun hökumətində bəhai vətəndaşlara qarşı təzyiq və təhdidlər müxtəlif formalarda davam etdirilir: “Təəssüflər olsun ki, verilən bütün vədlərə baxmayaraq Ruhani hökumətində bəhailərə qarşı nifrət hissini qızışdırmaq gücləndirilib. Belə ki, son aylarda ölkə mediasında bəhailərə qarşı 20 mindən çox yazı dərc edilib, anti-bəhai təbliğatı şiddətləndirilib.

Ruhani hökumətinin fəaliyyətə başlamasının ardınca 2013-cü ilin avqust ayında 151 bəhai tutulub, ən azı 388 bəhaiyə qarşı iqtisadi təzyiq göstərilərək, onların mağazaları və iş yeləri qapadılıb. Həmçinin minlərlə bəhai gəncin ali təhsil ocaqlarına daxil olmasının qarşısı alınıb, 28 bəhai öyrənci isə təhsil aldığı universitetlərdən xaric edilib.

Beynəlxalq Bəhai İcmasının BMT-dəki baş nümayəndəsi Bani Duqal jurnalistlərə açıqlamasında bildirib ki, Ruhani hökuməti, ölkədəki bəhai icmasını əzib məhv etmək üçün yeni taktikalara üz tutub: “Ruhani hökuməti sadəcə olaraq ölkədə bəhailərə qarşı tətbiq edilən repressiyaları səssiz-səmirsiz gizli şəkildə həyata keçirmək və bunu dünya ictimaiyyətinin gözündən gizlətmək taktikasından istifadə edir”.

Hesabatda həmçinin vurğulanır ki, 2005-ci ildən bu yana ölkədə 860-dan çox bəhai tutularaq təzyiqə məruz qoyulub, 275 nəfər isə həbsə salınıb.

Qeyd edək ki, Beynəlxalq Amnistiya Təşkilatının hesabatına görə, İranda 300 mindən çox bəhai yaşayır. İran Konstitusiyası bəhai dinini bir din kimi tanımır. İran İslam Respublikası bərqərar ediləndən bu ölkədə 200-dən çox bəhai edam olunub, onların dövlət idarə və qurumlarında işə götürülməsinə və sərbəst təhsil almasına qadağa qoyulub, digər hüquqları məhdudlaşdırılıb.

A.M

GUNAZ.TV

SON XƏBƏRLƏR