Ərdəbildə adı olmayan küçələrə ad veriləcək

SON XƏBƏRLƏR

Ərdəbildə adı olmayan küçələrə ad veriləcək – Bələdiyyə başqanı

2021.10.20, 07:36

Gunaz.tv

GünAz TV: Ərdəbil Bələdiyyə İdarəsinin başqanı şəhərdə adı olmayan küçə və məntəqələrə ad veriləcəyini açıqlayıb.

Həmid Lütfullahiyan bu barədə çərşənbə günü jurnalistlərlə danışığında məlumat verib.

“Bələdiyyə İdarəsinin İctimaiyyətlə Əlaqələr Şöbəsi şəhərdə adı olmayan küçə, məhəllə və digər məntəqələrə onların şəraitinə uyğun ad verməyə başlayıb. Şəhər əhalisindən xahiş edirik ki, adsız küçə və məntəqələr haqda Bələdiyyə İdarəsinə məlumat versinlər”- deyə o bildirib.

H.Lütfullahiyan Bələdiyyə İdarəsi ilə əməkdaşlıq etdiklərinə görə şəhər əhalisinə öz təşəkkürünü bildirib, onlardan küçələrə ad qoymaq işində idarəyə yardım etmələrini istəyib. Bələdiyyə başqanı küçə və məhəllələrə veriləcək adların türkcə olub-olmayacağına işarə etməsə də, şəhər sakinlərini prosesə qoşulmağa çağırıb. O bildirib ki, hər kəs idarəyə müraciət edərək nəzərdə tutulan anketi alıb və təklif etdiyi adları həmin anketdə yaza bilər.

“Xiyaban, küçə və məhəllə adları şəhərin mədəni və tarixi kimliyinin tərkib hissəsidir. Ona görə də ad vermək prosesində məntəqələrin kimliyi, şəhər əhalisinin həmin ada olan mənəvi bağlılığı və əhalinin şəhərdən olan informasiyası kimi amillərə diqqət yetirilir”- deyə o vurğulayıb.

Qeyd edək ki, ötən ay Təbriz 8-ci Məntəqə Bələdiyyə İdarəsinin icraçı direktoru mühəndis Rza Paknəhad Təbriz bazarında dəyişdirilən məkan adlarının yenidən tarixi adlarla əvəzləndiyini bildirmişdir.

Bir neçə il əvvəl isə Urmiyənin Bələdiyyə İdarəsi oxşar qərar verərək Urmiyə şəhərində dəyişdirilmiş bəzi məkan adlarını əsl türk adları ilə əvəzləmişdir.

Pəhləvi və İslam cümhuriyyəti dövründə türklərin tarix və kimliyini inkar etmək məqsədi ilə minlərlə məkanın adı türkcədən fars dilinə çevrilib və ya yeni fars adları ilə əvəzlənib. Güney Azərbaycan Əyalətlərində belə adların sayı minlərlədir.

N.S

GUNAZ.TV

SON XƏBƏRLƏR