GünAz TV: Urmiyə Şəhər Şurasının əksər üzvləri  tərəfindən ləğv edilməsi tələb olunan “Şəhrdari” voleybol komandasının gələcək fəaliyyəti sual altında qalmaqdadır.

Şəhər Şurasının sözçüsü Məhəmməd Xəlilpur Şuranın komandanın ləğv edilməsi ilə bağlı qərarı və Urmiyə Şəhər İcra Hakimiyyətinin qərarın əleyhinə rəy verməsi haqda “Təsnim” xəbər agentliyinə danışıb.

“Qanun baxımından “Şəhrdari” komandasının heç bir problemi yoxdur, onun əsasnaməsi və büdcə vəsaiti də məlumdur. Bəziləri deyir ki, Bələdiyyə İdarəsi yalnız yerli komandalar saxlaya bilər. Lakin bu il Daxili İşlər Naziri açıq şəkildə elan etdi ki, Bələdiyyə İdarələri istənilən klubu saxlaya bilərlər”- deyə o bildirib.

Şəhər Şurasının sözçüsü işçilərin əmək haqqı məsələsini komandanın ləğv edilməsi üçün bəhanə olduğunu deyərək qeyd edib ki, “Cari ildə Urmiyə Bələdiyyə İdarəsinin ümumi büdcəsi 1279 milyard tümən olub. Klubun büdcəsi isə 12 milyard tüməndən ibarətdir. Həm də bu məbləğ təkcə voleybola görə deyil, bütün komandalar üçün nəzərdə tutulub. İstənilən halda voleybol komandasının ləğvini tələb edən Şura üzvləri öz mövqelərini dəyişməsələr, qərar İxtilafları Həll edən Şuraya göndəriləcək.”

Məhəmməd Xəlilpur Şəhər Şurası ilə “Şəhrdari” komandasının məsulları arasında fikir ayrılığı məsələsinə də toxunub. “Şura yerli oyunçuların komandaya cəlb olunmasına israr edirdi. Lakin komandanın icraçı direktoru yerli olmayan 3 oyunçu ilə böyük məbləğ qarşılığında müqavilə imzalayıb. Halbu ki, bu məsələni balanslaşdırmaq lazım idi”- deyə o vurğulayıb.

Ötən günlərdə Urmiyə Şəhər Şurası bu şəhərin “Şəhrdari” voleybol komandasının ləğvi ilə bağlı qərar çıxarıb. Şuranın Azərbaycana qarşı yönələn qərarı azərbaycanlı milli-mədəni fəallar və bəzi yerli məsulların kəskin etirazı ilə qarşılanıb.

Şuranın qərarı bir neçə gün əvvəl Urmiyə Şəhər İcra Hakimiyyəti tərəfindən rədd edilib.

Bu hadisədən sonra komandanın ləğv edilməsinə tərəfdar olan Qərbi Azərbaycanın kürd kökənli valisi Məhəmməd Mehdi Şəhriyari, Urmiyə Şəhər İcra Hakimiyyəti başçısı Abbas Həsənxanini tutduğu vəzifədən azad edib. Vali verdiyi qərarın təfərrüatı barədə heç bir açıqlama verməyib.

Urmiyə Şəhər Şurasının “Sepah” üyəsi olan üzvü Hüseyn Pənahi isə ötən günlərdə “Şəhrdari” komandasının ləğv edilməsini yenidən gündəmə gətirib. O vurğulayıb ki, komanda ləğv olunmasa  məsələ “İdarələrin Ədalət Divanında” qaldırılacaq.

“Şəhrdari” voleybol komandasının gələcək fəaliyyətinin sual altında olması, təkcə Urmiyə əhalisi deyil, bütün güney azərbaycanlıların nigaranlığına səbəb olub.

N.S