Rəcayişəhr zindanına köçürülən Əmir Səttarinin vəziyyətə barədə heç bir məlumat yoxdur

SON XƏBƏRLƏR

Rəcayişəhr zindanına köçürülən Əmir Səttarinin vəziyyətə barədə heç bir məlumat yoxdur

2021.10.20, 07:36

Gunaz.tv

GünAz TV: Bir neçə gündür aclıq aksiyasının 14-cü gününü keçirməkdə olan güney azərbaycanlı milli-mədəni fəal Əmir Səttarinin vəziyyəti barədə heç bir xəbər yoxdur, bu məsələ onun ailəsinin nigaranlığına səbəb olub.

Əmir Səttari iyunun 19-u, aclıq aksiyasının 10-cu günündə Ettelaat İdarəsinin qərarı ilə Təbrizin Mərkəzi Zindanından Kərəcin Rəcayişəhr həbsxanasına köçürülüb.

Fəalın ailəsi onun yaxın dostlarına verdiyi məlumatda bildirib ki, Əmirlə əlaqə saxlamaq mümkün deyil, onun telefon əlaqələrinə də qadağa qoyulub. Ona görə də Əmirin vəziyyətə barədə heç bir xəbər yoxdur.

Səttari ailəsi aclıq aksiyası keçirməkdə olan övladlarının səhhətindən nigaran olduqlarını bildirib.

Əmir Səttari iyunun 10-da Təbrizin Mərkəzi Zindanında aclığa başlayıb, o aksiyasının 7-ci günündə quru aclıq aksiyasına keçib. Fəalın ailə üzvləri iyunun 10-da bildiriblər ki, Əmirlə əlaqə saxlayaraq ondan aksiyasını dayandırmağı istəyiblər. O aksiyasının 11-ci günündə su içməklə razılaşıb, lakin aclıq aksiyasını davam etdirəcəyini vurğulayıb.

Fəal yeni məhkəmə işinin açılması və ağır hökm çıxarılması ilə nəticələnən dosyesindəki iradlar və məhkəmə işinin ləngiməsinə etiraz olaraq iyunun 10-da Təbrizin Mərkəzi Zindanında aclıq aksiyasına başlayıb. Fəal məhkum olunduğu 7 aylıq həbs cəzasını başa vursa da yeni hökmə görə azadlığa buraxılmır.

Azərbaycanlı fəal dosyesindəki iradların təhlükəsizlik orqanlarının məhkəmə işinə müdaxiləsi nəticəsində əmələ gəldiyini bildirir.

Təbriz sakini olan Əmir Səttari universitetdə humanitar elmlər üzrə təhsil alır. O 2018-ci ilin yanvar (1396-cı ilin dey ayı) ayı etirazlarında təhlükəsizlik qüvvələri tərəfindən döyülərək saxlanılıb və Təbriz zindanına aparılıb. Fəal 25 gün sonra 100 milyon tümənlik mülki vəsiqə qarşılığında müvəqqəti olaraq azadlığa buraxılıb.

Azərbaycanlı fəal 2018-ci il yazın son ayında (1397-ci ilin xordad ayı) Təbriz İnqilab Məhkəməsinin 2-ci şöbəsi tərəfindən “milli təhlükəsizliyin əleyhinə toplaşma və sözləşmə” ittihamı ilə 7 ay azadlıqdan məhrum edilib. Hökm sonralar Şərqi Azərbaycan Apelyasiya Məhkəməsinin 3-cü şöbəsi tərəfindən olduğu kimi qüvvədə saxlanılıb. Fəal 2018-ci il iyulun 10-da 7 aylıq həbs cəzasını çəkmək üçün Təbrizin Mərkəzi Zindanına müraciət edib.

Əmir Səttari 2018-ci il sentyabrın 18-də Təbriz İnqilab Məhkəməsinin 2-ci şöbəsi tərəfindən “rəhbəri təhqir etmək” ittihamı ilə yenidən 6 ay həbs cəzasına məhkum edilib.

Təbriz İnqilab Məhkəməsinin 11-ci Hökmləri İcra edən Şöbəsi 2018-ci il payızın orta ayında (1397-ci ilin aban ayı) heç bir məlumat vermədən fəalın iki dosyesini birləşdirib. Bundan sonra Şərqi Azərbaycan Apelyasiya Məhkəməsinin 3-cü şöbəsi çıxarılan hökmləri “qanun və şəriətə uyğun gəlməyən” qərar kimi qiymətləndirərək fəal barəsində çıxarılan və icra olunan 7 aylıq hökmü 5 illik həbs qərarı ilə əvəzləyib.

N.S

GUNAZ.TV

SON XƏBƏRLƏR